الرئيسية 10 الصدى الأدبي 10 زمان غالي وحبيب

زمان غالي وحبيب

بقلم مي السراج

زمان بعيد قريب ومكان غالي وحبيب…
وتين الفؤاد….حارة وزقاق..ورواشين ..
امس كان….طفوله واصدقاء…..وستات وشبابات وامهات وجدات وداد ومحبه ووناسه وجمعات ……وشباب ورفقه وحشمه وحياء…..وآباء واجداد لهم كل المحبه والاحترام….. مدفع عيد…..وزغاريد….وشربات…..وتلفزيون بيرقص ويغني اهلا بالعيد ومن العايدين ومن الفايزين فرحان…….وحمام واستحمام وحنه وبيجامه كستور جديده قصينا ورقه السعر وكولونيا العيد كمان…..
فستان لي وبدله طيار لاخويا وكندره حمراء وكرته لستيته….ومدوره لتيزا……وابله اسوار…..

فستاني احمرعيد منفوش بالورد منقوش وشريط شعر ستان……. دا فستان سندريلا او فستان اميره……احلام ليله سعيده……..فيها ترتر يبرق ولمعان…..وراء كل روشان لوزيه ومعمول وطبطاب جنه وسمسميه…….وستو خديجه عملت دبيازه بعد ماداخ ابويا في شرا الحاجات……زنابيل كتيره وحمال بعربيه……كله استعداد فطور العيد والمقلقل والكبده والتعتيمه……..وقبل صلاة العيد كلنا مزهزهين……
والعيون عسلية وفرحانه والشعر بالورد والفل على الصدور……وسميه بنت العمدة بالتاج ملكه الزقاق والحاره …..وامنه بنت الامام فستان مزبرق فصوص فضيه ….ونجاة بنت العسكري
فستان بريش ابيض …..ياسلام ياسلام…..الوان….اشكال……….واولاد الحاره. …لابسين برضه…بدل عسكر وطيار……وفي دقله…..وبرضه مشلح وعقال. ……الحاره والبيوت واحنا كمان كلنا رستكه وترتيب وتبتبه متبتبه ……ياهو…….اهل اول…..كمل ……فرحه كبيره وحماس…….وكل عيد جواهرجي وبنجره وسلسال……وساعه للاولاد….وطبعا عيد العيدروس اول زياره بعد الفطور بالبيت الكبير…….وحنطور يدور ويحمل ويوصل للمراد……البيت قريب والبلد قلب كبير من باب جديد….لحاره البحر والخاسكيه وحاره المظلوم والشام…….وستي توصي بينا لاتصرفوا كل العيديه يافنجريه……العيد اربع ايام نهار وليليه……….وامي برضه توصي مانتوسخ ونضيع الشنطه والكندره ونجرح ركبنا وايدينا المتحنيه…….كل يوم نلبس جديد ونزور الاهل والبيوت ونبوس الايادي والخدود والشنط تتملي ريالات وعشرات العيديه……
وكل يوم سفره ملوخيه ناشفه ومختوم وعيش ابواللحم واصناف وروائح مشهيه……والكل بيساعد ويفرش ويلم……وسموار الشاي شغال……وشربات وكاسات وبالورد والكادي ترد الروح في الحر . وسنه وراء سنه قالوا خلاص يافاطمه كبرت وادورت وصرت مغطيه…….والمراجيح والنظنظه والدواره مع الاولاد منسيه………وقعدت اصوت وكيف اسوي بهديه خالي وعمي واحده بسكليته والتانيه سياره حمراء …..قالوا الحل نروح البحر وصار العيد غوص وموج وسمك وصياديه…….ويخلص اول يوم العيد ونحمل ونجري على الكباين والشاليهات …..وعيدنا شمس وماء ورمليه…….وطبعا هناك ملاعب ولونا بارك ومنتزهات ومطاعم……وجدة تزينت وتطورت وصار العيد حركات فرنجه وغاتو وباتون ساليه وفقط امسيه……وراحت ايام كيلو عشره والانوار البنفسجية …..وجلسه الكرويته كدا زي النخيل الايام ديه……..والعيد في القلب فرحه ورضا وصله رحم……..وباب مفتوح للصديق والجار. . …..تغيرت العادات وناسبت العصر والاوقات. ……ودي سنة الحياة……ومع ذلك الاصل والاصيل يحمل عبير الريحان……ويحفظ الذكريات…….ويحكي للاحفاد…..كل زمن له مميزات……والفرح هو باقي واساس…..في عيون براءه الاطفال……….عيدكم مبارك وسعيد يارب

 

عن سمر ركن

smr

اضف رد

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

x

‎قد يُعجبك أيضاً

ياأجملَ من تُشرِقُ فيهِ

ياأجملَ من تُشرِقُ فيهِ شمسٌ لِتُحَيِّي أراضيهِ وطني والنور يصافحهُ وعُلا الامجادِ تحييه هل نذكرَ ...